ფოტო ჯიხურში...

ქართველი ინტელიგენცია პატრიარქის გვერდით

დღეს რესტორან ”ჯაზუში” ქართველმა მსახიობებმა და მომღერლებმა შეკრება გამართეს ლოზუნგით - ”პატრიარქის სიცოცხლე საფრთხეშია”.

ბოლო დროს აქტუალური თემა თავისუფლების ინსტიტუტის წევრის , თეა თუთბერიძის მიერ ერთ-ერთ სოციალური ქსელში Facebook-ში გავრცელებული პარტიარქის წინააღმდეგ აგორებული კამპანია გახდა. ამაზე პროტესტი ბევრმა გამოთქვა. მათ შორის, ქართული ინტელიგენციის წარმომადგენლებმაც. მათი დღევანდელი შეხვედრა სწორედ ამ საკითხს მიეძღვნა. შეკრებას გურანდა გაბუნია, რეზო ესაძე, თამრიკო ჭოხონელიძე, ნინელი ჭანკვეტაძე და სხვვები ესწრებოდნენ.


”ეს პირველი შემთხვევა არ არის. ასეთი რაღაცა ადრეც მომხდარა. უბრალოდ თეა თუთბერიძე გახადეს სალაპარაკო. მე ეჭვი მეპარება, რომ ეს კამპანია ხელისუფლების მხრიდან მოდის. ალბათ, ეს ეშმაკის გამოცდა უფროა”,- აღნიშნა თამრიკო ჭოხონელიძემ.

რეჟისორი რეზო ესაძის თქმით, ჩვენი სულიერი სიწმინდე შეურაცხყოფილია, რომლისთვისაც საქართველო საუკენების მანძილზე იბრძოდა: ”ამ ხალხს მართლმადიდებლური სარწმუნოების შერყევა უნდათ, მაგრამ მათ უნდა შევუნდოთ.ოღონდ ისე კი არა, რომ გავათავხედოთ, არამედ ისე, რომ მეორეჯერ ვეღარ გაბედონ ასეთი რაღაცის გაკეთება”.

მსახიობმა გურანდა გაბუნიამაც თავისი გულისტკივილი გამოხატა: ”გული მწყდება, რომ ჩვენს უწმინდესს და უნეტარესს ტკივილი მიაყენეს. ვინ არის თეა თუთბერიძე არც ვიცნობ და არც მაინტერესებს, უბრალოდ ვიცი, რომ ვინც ასეთ რაღაცას აკეთებს, ღმერთი აუცილებლად გადაუხდის სამაგიეროს.”

მსახიობმა ნინელი ჭანკვეტაძემ შეხვედრაზე გასაშუქებლად მისულ Real-TV-ის ჟურნალისტს ინტერვიუ არ მისცა და განაცხადა: ”ისეთ ტელევიზიას არ მივცემ ინტერვიუს, რომელიც გირგვლიანის მკვლელობაში მონაწილე გურამ დოდნაძისაა. აქ იმიტომ მოვედი, რომ ვფიქრობ, პატრიარქის წინააღმდეგ შეურაცხყობის პროტესტი ნებისმიერ ადამიანს გაუჩნდებოდა. მთავრობამ ძალიან კარგად იცის, რომ საზოგადოებას თუ ვინმეს იმედი აქვს, ეს არის პატრიარქი და ეკლესია”.

საინფორმაციო სააგენტო ”მედიანიუს”-მა კი საქართველოს პრეზიდენტის ადმინისტრაციის პატრიარქთან დაკავშირებული განცხადება გაავრცელა, მასში ნათქვამია, რომ პრეზიდენტისთვის მიუღებელია ამგვარი ქმედებები და გამონათქვამები: ”ჩვენი აზრით, ეს არაეთიკური გამოხტომები ემსახურება საზოგადოების გახლეჩვას, პრეზიდენტის აზრით, ეკლესიის პროვოცირება და მისი ძალაუნებურად პოლიტიზირების მცდელობა საქართველოს არაკეთილმოსურნეთა ინტერესებს უწყობს ხელს”.

TV-25-ის მხარდასაჭერი აქცია გაიმართა

”თავისუფლება სიტყვას” - ამ ლოზუნგით დღეს საქართველოს პარლამენტის წინ რეგიონალური ტელევიზიის ”TV-25”-ის მხარდასაჭერი აქცია გაიმართა. შეკრება საქართველოს რეგიონალური მედიის ასოცოაციის ინიციატივით ჩატარდა.

რეგიონალურ ტელეკომპანიას დახურვა ემუქრება იმის გამო, რომ საგადასახადოს ვალი აქვს, რომლის გადაუხდელობის შემთხვევაშიც კანონი უფლებას ანიჭებს სახელმწიფოს ტელეკომპანიის ქონება აუქციონზე გაიტანოს. ტელეარხს დავალიანება ასლან აბაშიძის მმართველობის დროს დაედო. მაშინ არხი სოსო გოგიტიძის მფლობელობაში იყო. საქმე რამდენიმე წლის მანძილზე სასამართლოში განიხილებოდა. 9 ოქტომბრის ბათუმის საქალაქო სასამართლოს გადაწყვეტილებით კი ”TV-25”-ს 277 547 ლარის ოდენობით თანხის გადახდა დაეკისრა.

ტელეარხის ჟურნალისტი ლიზი თედორაძე აღნიშნავს, რომ ძველი დავალიანება უნდა ჩამოეჭრას და ახალი ვალის რესტრუქტურიზაცია მოხდეს: ”ვაპირებთ სასამართლო გადაწყვეტილების გასაჩივრებას. საქმე შეიძლება სტრასბურგშიც წავიღოთ. ჩემი და ტელევიზიის მოთხოვნა არის ის, რომ გადასახდელი თანხის რაოდენობა ხელმეორედ შემოწმდეს”.

მხარდასაჭერ აქციას ჟურნალისტი ზვიად ქორიძეს შეუერთდა, რომელიც აღნიშნავს, რომ ”ტელეარხი 25 მართლაც დასაცავია. მათ ძალიან დიდი პრობლემა შეექმნათ და ჩვენი საზოგადოება ინფორმირებული უნდა იყოს ამის შესახებ, რადგანაც არხი იხურება და სიტყვისა და გამოხატვის თავისუფლება ირღვევა”.

აქციას ახალი მემარჯვენეების წარმომადგენლებიც ესწრებოდნენ. მანანა ნაჭყებია აღნიშნავს: ”მიმაჩნია, რომ ”TV-25” პრობლემა არის ხელოვნურად შექმნილი. როდესაც ”რუსთავი 2” ანალიოგიურ სიტუაციაში იყო, ხელისუფლებამ დავალიანების გადახდის გადავადების საშუალება მისცა. იგივე უნდა გაკეთდეს სხვა ტელეკომპანიებთან მიმართებაშიც”.

ტელეარხ 25-ის მხარდასაჭერად პარლამენტის წინ ”მაესტრო”-ს ხელმძღვანელი მამუკა ღლონტიც იყო. ”საქართველოში თავისუფალი სიტყვა იზღუდება, ამიტომაც ჩვენ ერთმანეთს მხარში უნდა ამოვუდგეთ. როგორ შეიძლება ”რუსთავი 2”-ის და ”იმედი”-ს ფონზე სახელმწიფო რაიმე გადასახადებზე საუბრობდეს?! ეს ხომ დიდი უნომუსობაა...” - აღნიშნავს მამუკა ღლონტი.

ტელეარხ 25-ს სოლიდარობა საქართველოს პედაგოგთა და მეცნიერთა თვისუფალი პროფკავშირების წარმომადგენლებმაც გამოუცხადეს.

”ქართველთა ერთობის ტრაქტატს” ბესელიაც უერთდება

დღეს სამების საკათედრო ტაძარში პოლიტიკური პარტიის ”მოძრაობა ერთიანი საქართველოსთვის” ლიდერმა, ეკა ბესელიამ ”ქართველთა ერთობის ტრაქტატს” ხელი მოაწერა.
ტრაქტატი 14 ოქტომბერს, სვეტიცხოველში სრულიად საქართველოს კათოლიკოს-პატრიარქის, უწმინდესის და უნეტარესის, ილია მეორის ლოცვა-კურთხევით შეიქმნა. მას პირველად თვით ილია მეორემ მოაწერა ხელი. როგორც მასში წერია, საქართველოს ყველა კუთხის მცხოვრებნი და ქვეყნის საზღვრებს გარეთ მყოფნი ხელმოწერით აღუთქვამენ საქართველოს ერთგულებას და თანადგომას, რომ დაიცავენ ქვეყნის მიწა-წყალს და მის ღირსებას. ქადაგებისას კათოლიკოს-პატრიარქმა ქართველ ერს მოუწოდა ”ქართველთა ერთობის ტრაქტატისთვის” ხელი მოეწერათ. მსგავსი ”ივერიელთა ერთობის ტრაქტატი” თავდაპირველად 1790 წელს შეიქმნა.
ეკა ბესელიამ ტრაქტატზე ხელის მოწერის შემდეგ აღნიშნა: ”ამ ფიცით ჩვენ კიდევ ერთხელ ვიღებთ ვალდებულებას, რომ ერის მიწა-წყალს, თავისუფლებას და ღირსებას დავიცავთ და ვიბრძოლებთ მისთვის. ეს ის ღირებულებებია, რომლებიც ყველას უნდა აერთიანებდეს პოლიტიკური პოზიციის მიუხედავად. ვფიქრობ, პატრიარქის ეს ინიციატივა ერთ-ერთი ყველაზე ღირებული და დროული ნაბიჯია სამოქალაქო და ეროვნული თვალსაზრით”.
”ქართველთა ერთობის ტრაქტატს” სამების საკათერდო ტაძარში მისული მრევლიც აწერდა ხელს. ”ჩემთვის ბევრ რამეს ნიშნავს სიტყვები - გვიყვარდეს ჩვენი სამშობლო, ისევე როგორც ჩვენს წინაპრებს უყვარდათ. ქართველისთვის უპირველესი მოვალეობაა ქვეყნის ერთიანობისა და ღირსების დაცვა. ამიტომ ერი და ბერი ამ იდეის გარშემო უნდა იყოს გაერთიანებული” - აღნიშნა ვალერი ტეტუნაშვილმა.
თუმცა, ამ ტრაქტატზე ხელის მოწერას ბევრი შეეწინააღმდეგა. მათი აზრით, ეს მხოლოდ და მხოლოდ სიმბოლურია: ”ჩემთვის ამ ტრაქტატზე ხელის მოწერა მიუღებელია და არც მოვაწერ. ქვეყნის აშენება სიმბოლოებით კი არა, რეალური საქმით უნდა შევძლოთ. ჩემი მონაწილეობა ქვეყნის ერთიანობის შენარჩუნებასა და განვითარებაში გამოიხატება იმით, რომ ვაკეთებ ჩემს საქმეს. ამ ტრაქტატის შექმნა და მერე მასზე ხელის მოწერა დანაშაულად ნამდვილად არ მიმაჩნია. ”, - თქვა მოქალაქე თამაზ კუპრეიშვილმა.

ქვეყნის მთავარი პრობლემა

საქართველოს საზოგადოებრივ საქმეთა ინსტიტუტის სტუდენტებმა ჩაატარეს გამოკითხვა, რომლის მიზანიც ქვეყანაში არსებული ძირითადი პრობლემის დადგენა იყო. როგორც კვლევამ აჩვენა, გამოკითხულთა უმრავლესობას მიაჩნია, რომ მთავარი პრობლემა არის უმუშევრობა (36 ხმა).
მეორე ადგილას ტერიტორიული მთლიანობა გავიდა, ასი ადამიანიდან 25-სთვის აღმოჩნდა ეს პრობლემა ყველაზე მტკივნეული.
„აუცილებლად გვჭირდება ტერიტორიული მთლიანობის აღდგენა. რუსეთთან კარგი ურთიერთობით ბევრს მივაღწევთ. ჩხუბით არაფერი გამოვა.“, – თქვა 58 წლის მამაკაცმა.
იყო ძალიან საინტერესო პასუხებიც. ასე მაგალითად, ზოგისთვის გენდერული დისბალანსი, ფეხბურთი, საცობები, ნარკომანია, ღვთის ურწმუნობა და ა.შ. წარმოადგენს ქვეყნის ძირითად პრობლემას. „ადამიანები ცოდვაში არიან ჩავარდნილები, ღვთის შიში აქვთ დაკარგული და ღმერთისგან ძალიან შორს დგანან“,– აღნიშნა 41 წლის უმუშევარმა ქალბატონმა. მისი აზრით, თუ ადამიანები ქრისტესთან ახლოს მივლენ და მორწმუნენი გახდებიან, მაშინ ყველა პრობლემა მოგვარდება. აღარ იქნება შუღლი და მტრობა.
გამოკითხულთა უმრავლესობა 45–65 ასაკის ადამიანი იყო, მათგან 35 პედაგოგი, 16 სტუდენტი, ხოლო ათი – ხელოვანი ადამიანი. გამოკითხულ იქნა სხვა პროფესიის ადამიანებიც.
გამოკითხულებს პრობლემიდან გამოსვალაზეც ჰკითხეს. მათგან 27-მა განახცადა, რომ მთავრობა უნდა შეიცვალოს.
„ხომ ხედავთ რამდენი პრობლემაა საქართველოში, არც საშინაო და არც საგარეო პოლიტიკა არაა დაწყობილი. ჩემი აზრით, აქედან გამოსავალი მხოლოდ იმაში მდგომარეობს, რომ ეს მთავრობა უნდა წავიდეს. ან კიდევ პოლიტიკა შეცვალოს, რისი იმედიც ნამდვილად არ მაქვს“, – ამბობს არაქელოვა სურენი.
როგორც ზემოთ აღვნიშნე, მეორე ადგილას უმუშევრობის პრობლემა გავიდა. შესაბამისად ამ პრობლემის მოსაგვარებლად სამუშაო ადგილების შექმნა დაასახელეს.
„ჩვენს ქვეყანაში მოსახლეობის უმეტესობა დაუსაქმებელია. არ არის სამუშაო ადგილები და რა ქნან?! ამ პრობლემის მოსაგვარებლად უნდა შეიქმნას სამუშაო ადგილები, ქარხნები, საწარმოები უნდა ამუშავდეს“, – გამოთქვა მოსაზრება 23 წლის ეკონომისტმა, გიორგი ბიჭიაშვილმა.
აღსანიშნავია, რომ ასი გამოკითხულიდან 55 მამაკაცი იყო, ხოლო 45 – ქალი.

"საქართველოს აშშ–ის იმედი უნდა ჰქონდეს

გუშინ, ამერიკის შეერთებული შტატების სახელმწიფო მდივანი, ჰილარი კლინტონი რუსეთის საგარეო საქმეთა მინისტრს, სერგეი ლავროვს შეხვდა. როგორც კლინტონმა განაცხადა, მისთვის ლავროვს ქართული არმიის დახმარების თაობაზე კითხვა არ დაუსვამს. "თვითონ იცოდა პასუხი და ალბათ მაგიტომ არ დამისვა",–აღნიშნა სახელმწიფო მდივანმა ღიმილით. როგორც მან განაცხადა, საქართველოს ყოველთვის შეიძლება ჰქონდეს იმედი აშშ–ის სამხედრო დახმარების. ამის შესახებ ქართულმა სატელევიზიო არხებმა გადმოსცეს. "აშშ-ის სახელმწიფო მდივანმა ალექსეი ბენედიქტოვთან საუბარში ისიც განაცხადა, რომ ამერიკა ყველაფერს გააკეთებს იმისთვის, რომ საქართველომ თავი დაცულად იგრძნოს", – იუწყება "რუსთავი2".
ამასთანავე აღსანიშნავია, რომ აშშ საქართელოში ბუფერული ზონების შექმნის ინიციატივით გამოდის. ჰილარი კლინტონის განცხადებით, ბუფერულ ზონებს გაეროსა და ეუთოს დამკვირვებლები უნდა აკონტროლებდნენ. როგორც საინფორმაციო სააგენტოს ვებგვერდზე გამოაქვეყნეს, სახელმწიფო მდივანმა ქართულ, აფხაზურ და ოსურ მხარეებს პროვოკაციებისგან თავის შეკავებისა და პრობლემების მშვიდობიანად გადაწყვეტისკენ მოუწოდა, რათა ახალი სისხლისღვრა თავიდან იყოს აცილებული.

ძალადობის გარეშე

მსოფლიოში ყველა ქვეყანაში არსებობს ოჯახური ძალადობის პრობლემა. რა თქმა უნდა, საქართველოშიც. თუმცა, შეიძლება აღინიშნოს, რომ ჩვენს ქვეყანაში ოჯახური ძალადობის მსხვერპლი უმეტეს შემთხვევაში მალავს თავის პრობლემას. არიან ისეთებიც, რომლებიც ამბობენ კიდეც და რაღაც ზომებსაც იღებენ, მაგრამ სამწუხაროდ, მათი რიცხვი ძალიან მცირეა. არსებობს შესაბამისი ცენტრები, რომლებსაც ამ პრობლემის მქონე ადამიანებს შეუძლიათ დახმარებისათვის მიმართონ, თუმცა, შესაძლოა, უმეტესობას არც აქვს ამაზე ინფორმაცია. ამიტომაც კარგი იქნებოდა, თუ უფრო გააქტიურდებოდნენ შესაბამისი არასამთავროები და ადამიანის უფლებების დამცველები და ინფორმაციას მიაწვდიდნენ მათ.

პატრიარქის გაშარჟება შეიძლებააა???

დღეს დაღლილი სახლში მოვედი და "ფეისბუქში" შევედი. ეგრევე თვალი თეა თუთბერიძის მიერ დადებულ პოსტს შევავლე. თან კომენტარიც ედო: "ძალიან ნუ გაცხარდებით ჩემო მეგობრებო, მაგრამ ეს ვნახე და მინდა დავდო", ბოლოში ბევრი "სმაილიც" ჰქონდა დართული. პატრიარქის ფოტო შევნიშნე და ვიდეოს საყურებლად მოვემზადე. ვფიქრობდი, ნეტა რას ამბობს მეთქი უწმინდესი?! ნეტა არ მენახა... პატრიარქის ვიდეოზე დადებული ჰქონდათ ვიღაცის ხმა მიმსგავსებული ილია მეორის ხმაზე, რომელიც უწმაწურ სიტყვებს ამბობდა. საშინლად იმოქმედა ჩემზე, ასე მართლა არ ჩავრთულვარ არანაირ დისკუსიაში, ეგრევე კომენტარებში შევედი. ვცდილობდი დავმშვიდებულიყავი და კორექტულად მიმემართა თეასთვის. საინტერესოა, რისთვის სჭირდება ქალბატონ თუთბერიძეს პატრიარქის ასე დაცინვა. ჩვენ შორის ასეთი დიალოგი გაიმართა:
– "ძალიან იმოქმედა ამ ვიდეომ ჩემზე, რა არის ხალხნო, პატრიარქი და ჯეოსტარელები და პოლიტიკოსები, რომლებიც ყოველთვის ბინძური საქმეებით არიან დაკავებულნი, მგონი განსხვავდება ერთმანეთისაგან რა... და ზუსტად ჯარი ჩვენმა პრეზიდენტმა შეიყვანა, რაც დიდი შეცდომა იყო... მაგის გამო დაიხოცა უამრავი ქართველი" – ეს იმიტომ რომ მანამდე თეას ნათქვამი ჰქონდა, რომ "მაშინ რატომ არ იგრძენით შეურაცყოფილად თავი როცა ისმენთ იმას, რომ თურმე ის საცოდავი ხალხი, რომლებიც აგვისტოს ომის წინ ჩახოცეს რუსებმა (მშვიდობისმყოფელებმა და ერთმორწმუნეებმა) და რომლის დასაცავადაც ქართულმა ხელისუფლებამ ჯარი შეიყვანა სოფლებში, ეს თურმე შეცდომა ყოფილა და რომ თურმე ომის დაწყება ქვეყნის პრეზიდენტის ბრალი ყოფილა??? აქ რატომ არავინ იგრძენითთქო შეურაცყოფილად თავი, რატომ არაფერი თქვით ამაზე? თუ ის ხალხი ყველას ფეხებზე გკიდიათ. პატრიარქმა თქვა და აბა წინააღმდეგობას ვინ გაბედავდით"–ო.
თურმე პატრიარქს რაღაც უაზროდ "ვემორჩილებით"....
ამაზე თეას ირონიული პასუხი მივიღე:
– "- აი როგორ დამავიწყდა, უნდა მიმეწერა ზემოთ ვისაც სუსტი ნერვები გაქვთ არ უყუროთთქო :)))))). რატომ არიან ჯეოსტარელები და პოლიტიკოსები ყოველთვის ბინზური საქმით დაკავებულები? :)))))))))))))))) და საედან მოიტანე რომ პატრიარქი მათგან განსხვავდება? :))))))))))))))))))) ყველა ადამიანი ცოდვილიაო სასულიერო პირებისგან მომისმენია და მგონი რომ პატრიარქიც ადამიანია, არა? თუ ღმერთია? :)"
– "თეა, სუსტი ნერვები არაფერ შუაში არაა. და ჯეოსტარელები არ მიგულსხმია, როცა ბინძური საქმეები ვახსენე. პატრიარქიც ადამიანია, მაგრამ სასულიერო პირი. მისი შეურაცხყოფით, მართმადიდებლებს და ეკლესიას ვაყენებთ შეურაცხყოფას."
ერთი სიტყვით აღარ გავაგრძელებ, მაგრამ ბევრი დამცინავი და ირონიული კომენტარი დადო თუთბერიძემ და სამღვდელობა და პატრიარქი მიწასთან გაასწორა. რატომაა ნეტა ასე განაწყენებული ეკლესიაზე, საინტერესოა ძალიან.....

დედაენის ბაღი

მშრალ ხიდთან არსებულ დედაენის ბაღში სარეაბილიტაციო სამუშაოები ახლახანს დასრულდა. დადგეს ახალი სკამები, დააყენეს ორიგინალური განათება. ახლა ის შედარებით უფრო სუფთად და მოწესრიგებულად გამოიყურება. ამიტომაც იგი ახალგაზრდებისათვის თავშეყრის ერთ-ერთ ადგილად იქცა. ამ ბაღს ისტორიული მნიშვნელობაც აქვს. სწორედ ამ ადგილას იცავდნენ ქართველები მშობლიურ ენას დაახლოებით 30 წლის წინ. ამიტომაც დგას აქ დედაენის ძეგლი.
აქ მოსული ბავშვები და საერთოდ, ახალგაზდები გართობისთვის მოდიან. დედაენის ბაღში ”სკეიტბორდებისა” და ”როლიკების” სარბენი ბილიკებია გაკეთებული. ასევე, ხელოვნურ საცოცავ კედელსაც შენიშნავთ. საღამოობით განსაკუთრებით შეიმჩნევა ხალხის სიმრავლე. აი, როცა დაღამდება თითქმის ყველა სკამი შეყვარებული წყვილების მიერაა დაკავებული.
ეს ბაღი მტკვრის ნაპირზე მდებარეობს, ამიტომ ახალგაზრდების გარდა მოყვარული მეთევზეებიც მრავლად არიან. ჩამწკრივებულები ანკესებით ხელში საათობით ელოდებიან, თუ როდის წამოეგება მათ ანკესს თევზი. თან სხვადასხვა თემებზე საუბრობენ ხოლმე, ეტყობათ ერთმანეთი ამ ბაღში გაიცნეს.
”აქ ხშირად მოვდივართ. ასე ვთქვათ, თავს ვირთობთ ჩვენი საყვარელი საქმიანობის კეთებით. ხანდახან არის პერიოდი საერთოდ ვერ ვიჭერთ თევზს. ზოგჯერ კი სახლში კმაყოფილები მივდივართ”, - აღნიშნა ერთ-ერთმა მეთევზემ.
მიუხედავად ბაღის განახლებისა, მისი ისტორიული ხასიათი მაინც იგრძნობა, რადგანაც დედაენის ძეგლი ზუსტად შესასვლელში დგას.

მაკეინი საქართველოში ჩამოდის

ტელეკომპანია რუსთავი2-ის ცნობით, მალე საქართველოში ამერიკელი სენატორი, ჯონ მაკეინი ჩამოვა. ამის შესახებ რამდენიმე საათის წინ სენატორმა ამერიკაში ჩასულ დიმიტრი შაშკინს აცნობა. თუ როდის ჩამოვა მაკეინი ეს ზუსტად არ არის ცნობილი. რა სარგებლობას მოუტანს მისი ჩამოსვლა საქართველოს და რა შეხვედრებს გეგმავს სენატორი, ამას მალე გავიგებთ.

რადიო „თავისუფლება“ აფხაზეთსა და სამხრეთ ოსეთში

რუსული სააგენტო „იტარ–ტასის“ ცნობით რადიო „თავისუფლება“ მალე აფხაზეთსა და სამხრეთ ოსეთშიც დაიწყებს მაუწყებლობას. მათივე ცნობით ეთერში მაუწყებლობა 2 ნოებერს დაიწყება და ძირითადად ახალი ამბები და მიმოხილვები გავა. თუმცა, რადიოს თბილისის ბიუროს ხელმძღვანელი, მარინა ვაშაყმაძე ამბობს, რომ ეს პროექტი ჯერ შემუშავების პროცესშია.
თუ ეს პროექტი მართლა განხორციედა, უდავოა, რომ ორი ხალხის ერთმანეთთან დაკავშრების ერთ-ერთი საშუალება გახდება. ეს ხელს შეუწყობს აფხაზების, ოსებისა და ქართველების ერთმანეთან დაკავშირებას.
ეს ახალი ამბავი საქართველოში გაზეთმა „24 საათმა“ გააშუქა. „საინფორმაციო სააგენტო "აპსნი პრესი"-ის ცნობით სოხუმის რეჟიმის ე.წ. საგარეო საქმეთა მინისტრი სერგეი შამბა აფხაზეთში რადიო "თავისუფლების" მაუწყებლობას დასაშვებად მიიჩნევს, თუკი ეს არ იქნება ქართული პროექტი“, – წერენ „24 საათში“.

მსახიობის პრობლემა საქართველოში

მსახიობებისათვის მეტად მტკივნეულ პრობლემას სამუშაო ადგილების არარსებობა წარმოადგენს. მართლაც საქართველოში თეატრების ძალიან მცირე რაოდენობაა. კინოს კი იშვიათად იღებენ და იქ მოხვედრა ძალიან ძნელია. თეატრში არ არის ისეთი ანაზღაურება და პირობები, რომ მსახიობმა კარგად იმუშაოს და თავი კომფორტულად იგრძნოს. მათ არ აქვთ კარგად თამაშის სტიმული. უამრავი კარგი, პროფესიონალი და დამწყები მსახიობიც ვყავს. თუმცა, უმეტესობა მუშაობას ვერ ახერხებს. რა უნდა გაკეთდეს იმისათვის, რომ მათი მდგომარეობა გაუმჯობესდეს?! ჩემთვის ძალიან საინტერესოა და დიდი სიამოვნებით დავწერდი ამ პრობლემაზე.

სწალის საფასურის ზრდა

ერთ–ერთ ყველასათვის მტკივნეულ თემას სწავლების საფასურის უეცარი ზრდა განაპირობებს.
რამ გამოიწვია ყველა უმაღლეს სასწავლებელში გადასახადის ასეთი მომენტალური მატება?! რატომ არ აძლევენ საშუალებას შედარებით ნაკლებად შემოსავლიან ოჯახს ასწავლოს თავის შვილს უმაღლესში, თუკი მას მართლა დიდი სურვილი აქვს ცოდნის გაღრმავებისა.
დღესდღეობით მართლაც, მხოლოდ ისინი ახერხებენ უმაღლესი განათლების მიღებას, რომლებსაც შედარებით მაღალი შემოსვალი აქვთ.
არსებობს იმის საშისროება, რომ სწავლის საფასური მომავალში კიდევ უფრო გაიზრდება, რა ღონისძიებები უნდა გატარდეს იმისათვის, რომ ეს ზრდა შემცირდეს. და საერთოდ რა არის ამის მიზეზი? ნუთუ ისაა, რომ ჩვენი მთავრობის მიზანი შედარებით ნაკლებად განათლებული საზოგადების არსებობააა?
ეს თემა ძალიან მ6ტკივნეულია და ძალიან ბევრ ქართულ ოჯახს ეხება. ამიტომაც, დიდი სიამოვნებით ვიმშავებდი ამ საკითხზე.

პრეზიდენტის ეკონომიკური ინიციატივა

6 ოქტომბერს პრეზიდენტმა პარლამენტში სხდომა ჩაატარა. მან ხალხს თავისი ეკონომიკური ხედვები წარუდგინა. მიხეილ სააკაშვილმა მთავრობას ეკონომიკური გეგმა გააცნო და განაცხადა, რომ ქვეყანაში ლიბერალური ეკონომიკა უნდა არსებობდეს. „ეკონომიკური თავისუფლების აქტის“ საფუძველზე მაქსიმალურად შეიზღუდება მთავრობის როლი ბიზნესში. უნდა აიკრძალოს უკვე დადგენილი ლიცენზიების რაოდენობის მომატება. გადასახადის შემოღება და საგადასახადო განაკვეთის გაზრდა შესაძლებელი იქნება მხლოდ გამონაკლისის სახით, ისიც რეფერენდუმის ჩატარების შემდგომ. ინიციატივაში შედის:

1. სახელმწიფო ხარჯები <30%
2. ბიუჯეტის დეფიციტი <2%
3. სახელმწიფო ვალი <60%
4. არსებული ლიცენზების და ნებართვების გარდა ახლის შემოღება იკრძალება.
5. სახელმწიფოს ეკრძალება წილების ფლობა კერძო ბანკებში.
6. სოციალური დახმარებები მხოლოდ მიზნობრივად.
7. ვაუჩერები როგორც საჯარო ასევე კერძო სკოლებსაც
8. სახელმწიფო ეხმარება მხოლოდ პიროვნებებს და არა გაურკვეველ ინსტიტუტებს
9. ახალი მარეგულირებლების შექმნა იკრძალება.
10. ნებისმიერი ახალი გადასახადის შემოღება ან გაზრდა მხოლოდ რეფერენდუმით.

„ახალი ეკონომიკური სკოლა – საქართველო“ თავის ვებგვერდზე პრეზიდენტის ეკონომიკურ ინიციატივასთან დაკავშირებით აქვეყნებს შემდეგ შენიშვნებს:

ა) არაფერი ითქვა საკუთრების ხელშეუხებლობის დამკვიდრებაზე

ბ) გადასახადების შემცირება ჩანს არ იგეგმება - რაც ცუდია

გ) ფისკალური დისციპლინის თემა გაცილებით უფრო ფართოა და აქ გვჭირდება რადიკალური ზომები

დ) მონეტარული დისციპლინა - ამას არანაკლები ზარალი მოაქვს, ვიდრე თუნდაც საკუთრების პრობლემას (უბრალოდ ამას ერთბაშად ვერ ვგრძნობთ)

ე) არაფერი თქმულა ასევე საბაჟო და საგადასახადო ადმინისტრირების მძიმე წესებზე, რომელიც ხშირ შემთხვევაში ლოგიკას არის აცდენილი, არათუ მხოლოდ კონსტიტუციურ წესრიგს.

ვ) პრეზიდენტის მიერ ჩამოთვლილი საკითხების საერთო სახელად უფრო უპრიანია ეკონომიკური სტაბილურობის აქტი დაესახელებინა, თუმცა ამ სტაბილურობას ყველაზე მეტად ისევდაისევ საკუთრების ხელშეუხებლობა უზრუნველყოფს და თავისუფალი მონეტარული სისტემა.

ამ ინიციატივაზე ოპოზიციური პარტიების წარმომადგენლები სხვადასხვა მოსაზრებით გამოდიან. მაგალითად, ქრისტიან-დემოკრატების ლიდერი გიორგი თარგამაძე ამბობს, რომ ქვეყანაში, სადაც უფრო მწვავე ეკონომიკური პრობლემებია, ამგვარ აქტებზე არ უნდა გავამახვილოთ ყურადღება, ხოლო პეტრე მამრაძემ აღნიშნა: „ტრაგიკულია, რომ პრეზიდენტის სიტყვა და საქმე ერთმანეთისგან განსხვავდება“.
პარლამენტში ამ შეხვედრის განმავლობაში კიდევ ბევრ საკითხზე ისაუბრეს.
წამოიჭრა ერთ-ერთი მნიშვნელოვანი პრობლემაც. კერძოდ, „შეწყალების პროცედურების გამოსაძიებლად საპარლამენტო კომისიის შექმნის მიზანშეწონილობის საკითხს მხარი უმრავლესობის სამმა წევრმაც დაუჭირა“, – აქვეყნებს „ინტერპრესნიუსი“.
ასევე, დაიწყო ზვიად გამსახურდიას გარდაცვალების მიზეზების დამდგენი კომისიის შექმნის პროცედურაც.
ტელეკომპანიებმა „რუსთავი 2“-მა და „იმედ“-მა მხოლოდ პრეზიდენტის, ერთი შეხედვით ქვეყნის ეკონომიკის ამაყვავებელი ინიციატივები გაგვაცნო. არაფერი თქმულა დარჩენილ საკითხებზე დღის მთავარ გამოშვებებში. შეწყალების პროცედურების გამოძიებაც მნიშვნელოვან საკითხს წარმოადგენს. ეს თემები ტელეკომპანია „კავკასიამ“ გააშუქა და საერთოდ პარლამენტში შეხვედრას ამ მედიასაშუალებამ უფრო მეტი დრო დაუთმო.
ერთი აღსანიშნავი ფაქტიც, პრეზიდენტის ეკონომიკური ინიციატივა „ფეისბოქზე“ მხოლოდ ორმა ადამიანმა მოიწონა. იყო მსჯელობა და უმრავლესობა ფიქრობს, რომ ამ ინიციატივას ბევრი ნაკლი აქვს.

თბილისში მაწანწალა ძაღლები დადიან

თბილისში და შეიძლება ითქვას საქართველოს სხვა ქალაქებშიც უკვე კარგა ხანია მაწანწალა ძაღლების პრობლემაა. უპატრონო ცხოველებს ნებისმიერ ქუჩაში შეხვდებით და თუ ფრთხილად არ მოიქეცით შესაძლოა თქვენს ჯანმრთელობას სერიოზული საფრთხე დაემუქროს.
ძალიან ბევრი ადამიანი გახდა მაწანწალა ძაღლების მსხვერპლი. ამ საშიშროების წინაშე მეც არაერთხელ დავმდგარვარ. ქალაქის მერიის ზედამხედველობის სამსახური შესაბამის ზომებს რატომღაც არ იღებს. საინტერესოა, თუ რატომ არ მახვილდება ამ პრობლემაზე ყურადღება. დიდი სიამოვნებით გავარკვევდი ამ ამბავს და ვიმუშავებდი ამ პრობლემაზე.

რატომ არ გააშუქეს პედაგოგთა აქცია?!

5 ოქტომბრის ერთ–ერთ დღის თემას მასწავლებელთა მსოფლიო დღესთან დაკავშირებით განვითარებული მოვლენები წარმოადგენდა. ამასთან დაკავშირებით გავეცანი რამდენიმე ქართულ მედიასაშუალებას.
ამ დღეს პედაგოგთა პროფკავშირმა პარლამენტის წინ აქცია გამართა და გააპროტესტა ხელისუფების მხრიდან უყურადღებობა. როგორც აქციის მონაწილეები აცხადებდნენ, ირღვევა მასწავლებელთა უფლებები საქართველოში, მათი სახელფასო განაკვეთები შეადგენს მცირე თანხას, რა დაპირებებიც მათ ხელისუფლებიდან მიიღეს, ჯერ არცერთი არ შესრულებულა. „პედაგოგთა და მეცნიერთა თავისუფალი პროფკავშირის პრეზიდენტის მანანა ღურჭუმელაძის განცხადებით საქართველოს სკოლების 60 პროცენტს ვაუჩერით განსაზღვრული თანხა არ ყოფნის“, – აქვეყნებს საინფორმაციო სააგენტო ‘ინტერპრესნიუსი“.
ამის პარალელურად საქართველოს პრეზიდენტმა, მიხეილ სააკაშვილმა თავის რეზიდენციაში ქვეყნის დამსახურებული და ყველაზე დიდსტაჟიანი მასწავლებლები მიიწვია და შეხვედრა გამართა. შეხვედრას განათლების მინისტრიც ესწრებოდა. ისაუბრეს სხვადასხვა პრობლემებზე, განიხილეს განათლებასთან დაკავშირებული საკითხები. პრეზიდენტმა პედაგოგები ღირსების ორდენით დააჯილდოვა და სადილზე დაპატიჟა.
ეს ამბავი ტელეკომპანიებმა „იმედმა“ და „რუსთავი2“-მა თითქმის ერთნაირად გააშუქეს. მათ მხლოდ ის აჩვენეს, თუ როგორ შეხვდა პრეზიდენტი მასწავლებლებს და ერთ–ერთმა ყველაზე ხანშისესულმა პედაგოგმა როგორ გამოხატა ნდობა და სიყვარული სააკაშვილის მიმართ. იმაზე თუ რას ითხოვდნენ პარლამენტის წინ მდგომი პედაგოგები საერთოდ არ იყო ნახსენები საღამოს მთავარ საინფორმაციო გამოშვებებში – „ქრონიკასა“ და „კურიერში“.
ტელეკომპანია „კავკასიამ“ კი შეხვედრასთან ერთად გააშუქა ისიც, თუ რა მოთხოვნებით იდგნენ აქციაზე პედაგოგები და პედაგოგთა პროფკავშირი. შემდეგ კი ამას პარლამენტის თავმჯდომარის კომენტარიც მოყვა, რომელმაც „ბრძანება გასცა“ პედაგოგთა მიერ მოთხოვნილი კანონპროექტი პარლამენტში დროულად განეხილათ.
თუ პროფესიონალური თვალით შევხედავთ, მივხვდებით, რომ პედაგოგთა მიერ მოწყობილი აქცია დღის ერთ-ერთ მთავარ ახალ ამბავს წარმოადგენდა, მაგრამ ორმა ყველზე დიდმა ქართულმა ტელეარხმა რატომღაც ამას ერთი წუთიც კი არ დაუთმო. რატომღაც კი არა ყველამ ვიცით, რატომაც არა. ეს სამწუხარო ფაქტია!

იდეა დევნილთა პრობლემაზე

ერთი იდეა კარგა ხანია მაქვს. ეს ლტოლვილთა ერთ–ერთ პრობლემას ეხება. როგორც ვიცით, 2008 წლის რუსეთ–საქართველოს ომის შედეგად სამხრეთ ოსეთიდან დევნილებმა დაკარგეს სახლ-კარი, მათთვის საქართველოს ხელისუფლებამ სახლები ააშენა და მიმდებარე ტერიტორიაზე პატარა მიწის ნაკვეთები დაურიგა კიდეც. იძულებით გადაადგილებული პირები დაახლოებით 2008 წლის დეკემბრის თვეში შესახლდნენ მათთვის განკუთვნილ სახლებში. როგორც მაშინ მოახსენეს ეს სახლები და მიწის ნაკვეთები მათ საკუთრებას წარმოადგენდა, თუმცა ჯერჯერობით კანონიერად მაინც არ აქვთ დასაკუთრებული. მას სემდეგ თითქმის ერთი წელი გავიდა.
საინტერესოა, თუ რატომ აჭინაურებს ხელისუფლება სახლებისა და მიწის ნაკვეთების ოფიციალურად მათ საკუთრებაში გადაცემას. ახლა, კი მიმდინარეობს დევნილების რეგისტრაცია, შესაძლოა ამ პროცესის შემდეგ მოხდეს მათი გადაფორმება, თუმცა, ეს დანამდვილებით არავინ იცის. ამ პრობლემაზე ვიმუშავებდი დიდი სიამოვნებით.